Fækka á biðlistum með því að bjóða upp á skerta vistun

Ríflega 700 börn eru enn á biðlista eftir plássi á frístundaheimilum Íþrótta- og tómstundaráðs. Stjórn ÍTR samþykkti á fundi sínum að bjóða foreldrum í þeim hverfum þar sem biðlistar eru að fækka vistunardögum þannig að hægt væri að taka inn börn af biðlistum.

Fram kemur í tilkynningu frá ÍTR að um tilraunaverkefni sé að ræða og að reynsla næstu vikna verði síðan metin fyrir árið 2008 og hvort þessi breyting verði látin ganga yfir öll frístundaheimili ÍTR.

Fram kemur í greinargerð frá ÍTR að skrifstofustjóri tómstundamála og sviðstjóri ÍTR hafi fundað með forstöðumönnum frístundamiðstöðva til að reyna að leysa vandanna. Lagt hafi verið til að foreldrar fengju að kaupa staka daga á frístundaheimilunum þannig að fleiri börn kæmust að. Var vísað til skoðanakönnunar á vegum ÍTR sem sýndi að þriðjungur foreldra myndu kjósa fjóra daga eða færri í viku fyrir börn sín. „Ef það hlutfall (35%) væri fært yfir á þau frístundaheimili þar sem biðlistar eru enn gætu um 300 börn komist af með skerta vistun þ.e. 4 daga eða færri á viku," segir í greinargerð ÍTR.

Þessa tillögu ákvað meirihluti stjórnar ÍTR að nýta og ná breytingarnar til frístundaheimila í Grafarvogi, Breiðholti, Árbæ og Grafarholti auk nokkurra annara á höfuðborgarsvæðinu þar sem biðlistar eru. Engir biðlistar eru í Vesturbæ, miðborginni og Hlíðunum. Gert er ráð fyrir að þessar breytingar kosti allt að 5 milljónir.

Í greinargerð ÍTR kemur enn fremur fram að 1.933 börn séu komin með vistun á frístundaheimilum og er það svipað hlutfall og undanfarin tvö ár. Bent er á að eftirspurn hafi aukist gífurlega á þessu tímabili eða um rúmlega 400 börn.