Valtýr skiptir um lið

„Ég er afar sáttur," segir íþróttafréttamaðurinn knái, Valtýr Björn Valtýsson, en hann hefur verið ráðinn til útvarpssviðs 365 miðla og mun útvarpsmaðurinn stjórna íþróttaþætti á X-inu 977.

„Hann verður með svipuðum hætti og Mín skoðun á XFM en eitthvað breyttur þó," segir Valtýr sem kvaðst glaður yfir því að vera kominn aftur á fornar slóðir en hann var lengi á mála hjá Bylgjunni sem er í sama húsi og rokkhundarnir á X-inu.

Valtýr var einn þeirra fjölmörgu sem neyddust til að taka sitt hafurtask þegar útvarpsstöðvunum XFM og Kiss FM var lokað um áramótin. Hann telur sig vera kominn á réttan stað enda sé stutt yfir til sjónvarpsstöðvarinnar Sýnar sem nýlega eignaðist sýningarréttinn á enska boltanum en Valtýr hefur undanfarin ár lýst leikjum úrvalsdeildarinnar á Skjásport og viðurkennir að þessi staðreynd hafi óneitanlega kitlað. „Meginástæðan er samt sú að við heyrumst út um allt land og það skiptir mig miklu máli," segir Valtýr.