Liverpool vill ráða heimagæslu

Liverpool er nú að íhuga að ráða öryggisfyrirtæki til að gæta heimili leikmanna liðsins þegar þeir eru fjarri heimilum sínum vegna útileikja Liverpool.

Fyrirliði liðsins, Steven Gerrard, varð í vikunni sjötti leikmaður liðsins sem verður fyrir barðinu á innbrotsþjófum á skömmum tíma. Á sama tíma og brotist var inn á heimili hans var hann að spila með Liverpool gegn Marseille í Frakklandi.

Eiginkona hans, Alex Curran, var að vísu stödd á heimili hjónanna en hlaut engan skaða af.

Auk sexmenninganna var brotist inn á heimili Dirk Kuyt í Liverpool þegar hann var fjarverandi með hollenska landsliðinu.

Rafael Benitez, stjóri Liverpool, hefur verið spurður um málið og segir hann að það sé í skoðun hjá félaginu.

„Við höfum rætt við öryggisfyrirtæki og erum að reyna að finna lausn á þessu," sagði Benitez. „Við höfum einnig rætt við lögregluna því þetta er allt saman mjög furðulegt. "

Lögreglan hefur greint frá því að innbrotsþjófarnir á heimili Gerrard náðu að ræna Rolex-úri Curran og tveimur bíllyklum.