Erlendur stefnir á Íslandsmet

Allt stefnir í Íslandsmet í sölu á nýrri bók Arnaldar Indriðasonar um rannsóknarlögreglumanninn Erlend Sveinsson í ár. Harðskafi, sem er áttunda sagan um Erlend, var prentuð í stærsta upplagi frá upphafi og hefur þegar verið endurprentuð, en þriðja prentunin verður svo sett í gang á næstu dögum. Með henni fer upplagið hátt í 30 þúsund eintök. Þetta er algjört einsdæmi í íslenskri bókaútgáfu, engin íslensk skáldsaga hefur náð þessum árangri fyrr.

Viðurkenningunum rignir reyndar yfir Arnald þessa dagana, sem fékk nýlega tilnefningu til Martin Beck verðlaunanna í Svíþjóð. Nú hefur Röddin, sem kom út í ársbyrjun í Frakklandi hjá forlaginu Métalié, hlotið hin virtu verðlaun ,,Grand Prix de Littérature Policière" sem besta erlenda glæpasagan sem kom út í Frakklandi á árinu.

Þar skipar Arnaldur sér í hóp heimsþekktra höfunda, eins og Ian Rankin, Michael Connelly, Peter Robinson, Caleb Carr, Elizabeth George, Michael Dibdin og James Patterson North og fleiri. Ljóst er að bækur Arnaldar njóta mikilla vinsælda í Frakklandi, því þetta eru fimmtu verðlaunin sem honum hefur hlotnast þar frá því að Mýrin var gefin út 2005.

Grand Prix de Littérature Policière verðlaunin voru stofnuð í Frakklandi 1948 og eru virtustu verðlaun í Frakklandi fyrir glæpasögur. Tvenn verðlaun eru veitt árlega, annars vegar fyrir frumsamdan krimma á frönsku og hins vegar fyrir þýðingu á erlendum reyfara. Röddin hlaut strax lofsamlega dóma í frönskum dagblöðum, m.a. gaf Mikaël Demets hjá tímaritinu Evene bókinni fimm stjörnur og segir hana búna miklu innsæi og eiginleikum sem snerta lesandann djúpt, en slíkt sé fágætt í glæpasögum.