Ólöf Arnalds slær í gegn erlendis

Geisladiskur Ólafar Arnalds, Við og Við sem kom út í Evrópu í haust hefur verið að fá góða dóma í erlendu pressunni. Danir virðast vera sérstaklega hrifnir og umfjöllun um diskinn hefur birst í öllum stærstu tónlistarblöðunum. Soundvenue tímaritið segir tónlistina "sanna og snerti mann djúpt". Undertoner hrósar diskinum og hann fær 4,5 af 6: "Mjög sterk plata".

Diskant vefsíðan líkir gæsahúðartónlist Ólafar við guðinn Orfeus þegar hann strauk gígju sína og töfraði þá sem hlýddu, diskurinn fær 8 stjörnur af 10 mögulegum. Sonic, eitt helsta tímarit Svía valdi lag eftir Ólöfu á mánaðarlegan geisladisk sinn og segir frumraun hennar "áhrifamikla og sé góð sönnun um að líf sé í söngvaskáldsgeiranum".

Þýska síðan Nordische Musik sem fjallar mikið um íslenska tónlist segir diskinn "dásamlegan og einstaka frumraun", og tónlistin nána og heillandi, klykkir svo út með 5 punktum af 6. Franski vefmiðillinn Millefeuille segir diskinn velkominn í heim klassískrar þjóðlagatónlistar og sé "undursamlega fagur". Að lokum fjallar hinn fjölsótti rússneski vefur Icelandic Culture um diskinn og hælir honum á hvert reipi, rýnirinn "bókstaflega bráðnaði í tónaöldunum".