Justin sagður í tygjum við Scarlett

Breska blaðið News of the World greindi frá því á sunnudaginn að Scarlett Johansson væri að öllum líkindum hjónadjöfullinn í sambandi Justins Timberlake og Cameron Diaz.

Samkvæmt blaðinu hófst samband Timberlake og Scarlett þegar þau unnu saman að gerð tónlistarmyndbands við nýjustu smáskífu söngvarans, What Goes Around. Hið merkilega er að myndbandið byggist á sambandi Justins við Britney Spears enda er líkamsvöxtur þeirra Spears og Johansson sagður keimlíkur. Heimildarmönnum News of the World ber saman um að vel hafi farið á með þeim á tökustað en eru jafnframt sammála um að Justin reyni allt hvað hann geti til að halda þessu leyndu.

Justin og Cameron eru sögð hafa slitið samvistir í síðustu viku. Timberlake hló reyndar að blaðamönnum sem spurðu hann að þessu þegar poppstjarnan mætti á frumsýningu kvikmyndarinnar Alpha Dog en Timberlake reynir þar fyrir sér á hvíta tjaldinu. „Hlutirnir gengu einfaldlega ekki upp hjá Justin og Cameron," segir einn heimildamaður blaðsins. „Hann var á leiðinni í tónleikaferðalag og vildi einbeita sér að því af fullum krafti," bætir hann við. „Hins vegar virtist það ekki koma að sök þegar hann gerði sér dælt við Scarlett."

News of the World greinir jafn-framt frá því að þeim Justin og Scarlett hafi komið einstaklega vel saman í frumsýningarteiti Alpha Dog og gestir og gangandi hafi vel getað greint að þar bjó eitthvað meira að baki en einskær vinátta. „Þau vildu halda þessu leyndu en Justin gat varla haft augun af Scarlett," segir einn viðstaddra.

Ef af sambandi Scarlett og Justin verður gætu hlutirnir í kvikmyndaborginni Hollywood orðið nokkuð flóknir. Scarlett var áður með Jared Leto sem síðan var lengi með Cameron Diaz en hún hætti með honum til að byrja með Justin Timberlake. Scarlett hefur áður komist á forsíður blaðanna fyrir skrautlegt einkalíf en leikkonan lýsti því yfir að hún gæti ekki verið nokkrum manni trú, slíkt stangaðist á við lífsspeki hennar.