Biblía gáfaða fólksins skrifuð af ljóðahomma úr Æsufellinu

Út er komin bókin, Biblía gáfaða fólksins, en höfundur bókarinnar kallar sig Gills N. Eggerz. Þar er gert stólpagrín að eurovisionstjörnunni Gillzenegger sem gaf út bókina, Biblía fallega fólksins, um síðustu jól.

Svo virðist sem höfundi bókarinnar sé í nöp við Gillzenegger og hefur meðal annars kallað hann "appelsínu gula manninn" í fréttatilkynningum.

Einhverjir hafa haldið því fram að baki bókarinnar standi Gillzenegger sjálfur en hann vísar svoleiðis fullyrðingum á bug. „Ég hef aldrei heyrt um þessa bók, en ætli þetta sé ekki bara 30 kílóa ljóðahommi úr Æsufellinu að reyna að vera eitthvað fyndinn," sagði Gillzenegger í samtali við Vísi.

Nafn höfundar bókarinnar virðist dulnefni en þeir sem að bókinni standa hafa farið hamförum í netheimum undanfarið við að vekja athygli á bólinni. Meðal annars er hið þekkta myspace samfélag notað til kynningar á bókinni. Þar segir:

Gils N. Eggerz er Gáfumenni af A gerð. Eitt af hans helstu markmiðum er að fræða sauðsvartan almúgann um gáfumennsku og það sem í henni felst. Þessi síða er honum tileinkuð og ætlað að koma á framfæri stórkostlegu riti hans: Biblíu gáfaða fólksins. Sjálfur myndi Gils aldrei leggjast svo lágt að nota Myspace, eins og segir í bókinni:

"...á samkomustað hinna minni andans máttar, 'mæspeisinu', þar sem fávitarnir keppast við að hlandmerkja sér verri fnyk en náunginn, og er andrúmsloftið þar orðið svo mengað að menn eru fluttir rænulausir á sjúkrahús, með þvagfærasýkingar í lungunum."