Vilja starfsmenn Blackwater fyrir dóm

Írösk stjórnvöld hafa krafist þess að vopnaðir starfsmenn verktakafyrirtækisins Blackwater verði dregnir fyrir dóm vegna morða á sautján almennum borgurum í Bagdad í síðasta mánuði. Opinber rannsókn sýni að þeir hafi ekki verið að svara árás þegar þeir hafi skotið á fólkið.

Tuttugu og þrír særðust í skotárásinni þann sextánda síðasta mánaðar. Í fyrstu var sagt að ellefu hefðu týnt lífi en nú hefur rannsókn íraskra yfirvalda leitt í ljós að sex til viðbótar hefðu fallið fyrir byssukúlum Blackwater-manna. Fyrirtækið er með margar milljóna dala samninga við bandarísk stjórnvöld og falið að gæta sendifúlltrúa og háttsettra erlendra gesta í Írak.

Ný skýrsla þingnefndar hefur gagnrýnt starfsemi og rekstur Blackwater, sem og annarra verktakafyrirtækja í Írak, en vopnaðir starfsmenn þeirra eru sagðir vel á annað hundrað þúsund í landinu. Þeir hafa tekið að sér ýmis verk sem áður voru á könnu hermanna.

Rannsókn íraskra yfirvalda er einnig sögð sýna að ekki hafi verið skotið á liðsmenn Blackwater áður ein þeir hafi hleypt af - en þeir hafa fullyrt að skothríð þeirra hafi verið svar við árás.

Írakar eru æfir og vilja að Blackwater-menn verði sóttir til saka. Írösk stjórnvöld krefjast þess nú líka og munu lög hafa verið undirbúin sem færa verktaka í Írak undir þarlend lög. Vopnaðir verðir sem ráðnir hafa verið af bandarískum yfirvöldum í Írak njóta friðhelgi og er ekki hægt að lögsækja þá samkvæmt samkomulagi sem Írakar og Bandaríkjamenn gerðu með sér árið 2003. Þessu vilja írösk yfirvöld nú breyta.