Styttist í endurkomu Kristjáns Jóhannssonar

„Ég get ekki uppljóstrað hvenær það verður, en þetta verður fyrr en seinna á þessu ári,“ segir óperusöngvarinn Kristján Jóhannsson. Hann hyggst snúa aftur til Íslands og halda tónleika hér á landi en það yrðu þeir fyrstu eftir að mikið fjölmiðlafár varð í kringum góðgerðatónleika Ólafs M. Magnússonar árið 2004 en þar var Kristján sagður taka óeðlilega há laun fyrir að koma fram.

Kristján var þögull sem gröfin um það hvenær og hvar tónleikarnir yrðu en taldi nokkuð víst að þeir yrðu á undan tónleikum Andrea Bocelli í Egilshöll í lok október. „Vonandi verða þetta ánægjulegir endurfundir og kannski verður maður bara eins og týndi sonurinn, alikálfinum slátrað og þar fram eftir götunum,“ bætir Kristján við.

Hetjutenórinn hefur haft nóg fyrir stafni. Hann er með tólf nemendur hjá sér í kennslu og hefur verið að æfa nýjar óperur. Enn sem fyrr er mikil eftirspurn eftir kröftum Kristjáns. Kristján hefur jafnframt verið duglegur við að halda tónleika og þegar Fréttablaðið náði tali af honum voru einir sjö í burðarliðnum.

Kristján býr við Gardavatn á Ítalíu og varð nýlega fyrir því óláni að missa farsíma sinn ofan í vatnið þegar hann var á siglingu með vini sínum. „Já, þarna hurfu nokkur hundruð símanúmer með góðum samböndum. En mér gafst líka tækifæri til að vinsa út þá sem ég vildi ekki lengur hafa í símanum hjá mér.“