170 björgunarsveitarmenn hafa tekið þátt í leit í Soginu

Hátt í hundrað og sjötíu björgunarsveitarmenn leita enn mannsins sem féll í Sogið í gær. Bóndinn á Bíldsfelli vann þrekvirki er hann bjargaði félaga mannsins.

Þórir Erlingsson björgunarsveitarmaður segir að sveitirnar hafi fengið útkall um klukkan 17 í gær um að maður hefði fallið í Sogið við Bíldsfell. Strax hafi verið ráðist í miklar aðgerðir með þátttöku bátamanna, göngumanna, svifnökkva, þyrlu og flugvélar. Aðspurður segir hann að á bilinu 170-180 manns hafi komið að leitinni.

Mennirnir tveir voru við veiðar í Soginu þegar annar þeirra missti fótanna og féll í ána. Félagi hans reyndi að bjarga honum með þeim afleiðingum að hann fór sömu leið. Þórir segir bóndainn í Bíldsfelli hafa farið út í ána á árabát sínum og bjargað félaga mannsins sem saknað er. Að hans mati hafi bóndinn unnið gríðarlegt björgunarafrek. Hann hafi tekið ansi fast á árunum.

Áin er mjög erfið yfirferðar á þessum slóðum. „Sogið sameinast Hvítá og verður að Ölfusá. Sogið er mjög straumhart og Ölfusáin líka. Þetta eru erfiðar ár yfirferðar og þarna fer enginn um á bátum nema þauþjálfaðir menn," segir Þórir

Þyrla Landhelgisgæslunnar fer nú eftir hádegið aftur austur og hjálpar til við leitina.