Skilum góðærinu til fólksins

Nú er ríkið búið að greiða niður skuldir ríkissjóðs að mestu. Í langri valdatíð sjálfstæðismanna hafa skuldir heimilanna hinsvegar vaxið mikið vegna rangrar efnahagsstefnu, viðskiptahalla, verðbólgu og okurvaxta.

Skatttekjur ríkisins hafa stóraukist á kjörtímabilinu. Í hvað var peningunum varið? Við sjáum þá ekki í fleiri hjúkrunarrýmum, háskólum á landsbyggðinni eða bættum samgöngum. Meðan skuldir ríkissjóðs hafa verið greiddar niður hafa skuldir heimilanna í landinu margfaldast. Þensla ríkisins hefur étið upp afganginn. Hún sést best í einkavinavæðingu, ótal nefndum um ekkert og pólitískum ráðningum. Þessu viljum við breyta.

Það er komið að fólkinu í landinu að greiða niður skuldir heimilanna. Við viljum auka ráðstöfunartekjur einstaklinga með því að hækka skattleysismörk samkvæmt verðlagsþróun í 140 þúsund og heimilin munar um það. Við viljum lækka tekjuskatta á einstaklinga í 28% ef kostur gefst. Við treystum fólkinu til að ráðstafa fénu og greiða niður skuldir sínar. Fólkið þarf að axla ábyrgð á sínum skuldum fremur en treysta á skuldahvetjandi vaxtabótakerfi, þar sem ríkið þarf aðeins að hækka fasteignamat til að breyta öllum forsendum.

Íslandshreyfingin leggur áherslu á að draga úr forræðishyggju og hætta að hegna fólki fyrir fyrirhyggju með því að skerða lífeyri. Aldraðir og öryrkjar eru líka einstaklingar, afnám tekjutenginga bætir kjör margra verulega og skilar sér langbest til þessa hóps sem kjarabót og örvun til að fara út á vinnumarkaðinn. Þjóðinni er meiri akkur í að hvetja fólk til þátttöku í samfélaginu og njóta starfskrafta þess eins lengi og kostur gefst.

Ísland er eitt ríkasta land í heimi. Það er tímabært að allir fái að njóta ávaxtanna. Við viljum lækka skatta á einstaklinga og fyrirtæki án þess að draga úr velferðarkerfinu. Hvernig? Svarið er einfalt. Með framúrskarandi rekstrarumhverfi löðum við að okkur arðsöm fyrirtæki. Engin flókin hagfræði: Lægri prósenta á meiri hagnað fyrirtækja gefur miklu fleiri krónur í velferðar-, samgöngu- og menntakerfið.

Það er nauðsynlegt að draga úr gífurlegum viðskiptahalla. Við treystum fólkinu til þess að hugsa málið, draga úr neyslu, greiða niður skuldir og velja íslenskt.

Höfundur skipar 1. sæti á lista Íslandshreyfingarinnar í Suðurkjördæmi.