Leikskólaráð hefur samþykkt að ganga til samningaviðræðna við forsvarsmenn Hjallastefnunnar um að taka yfir rekstur leikskólans Laufásborgar og að rekstur hefjist í samræmi við það í haust. Viðræður hefjast við forsvarsmenn Hjallastefnunnar í næstu viku.

Þorbjörg Helga Vigfúsdóttir, formaður Leikskólaráðs, segir að Laufásborg hafi í mörg ár verið rekin með sama hætti og leikskólar á vegum Hjallastefnunnar og fyrir liggi viljayfirlýsingar foreldra og kennara um að Hjallastefnan taki við skólanum. Þorbjörg segir borgaryfirvöld einnig spennt fyrir því að koma upp grunnskóla Hjallastefnunnar í Reykjavík.

Leikskólaráð hefur verið að endurskoða samninga við einkareknu skólana í borginni. Þorbjörg segir að vilji sé til þess að samræma þessa samninga og einfalda.

Fulltrúar minnihlutans sátu í atkvæðagreiðslu um tillöguna um Laufásborg. Í bókun þeirra sagði að tillagan fæli ekki aðeins í sér málsmeðferð heldur einnig niðurstöðu. Skynsamlegra væri að fara ofan í saumana á faglegum og fjárhagslegum forsendum, fordæmisgildi og samningum við starfsfólk áður en afstaða væri tekin um að fela Hjallastefnunni rekstur Laufásborgar. Fulltrúar meirihlutans mótmæltu því. Ekki náðist í Júlíus Vífil Ingvarsson, formann menntaráðs.