Ný týpa sem er alltaf hress

Tónlistarmaðurinn Davíð Þór Jónsson þykir með skemmtilegri mönnum og er uppátækjasamur með eindæmum. Þessa dagana fóstrar hann nýja persónu innra með sér.

„Hann sefur aldrei. Borðar eingöngu rautt kjöt og grænt grænmeti, drekkur dýrt kampavín og er alltaf hress. Yfirgengilega hress.“ Þetta segir Davíð Þór Jónsson tónlistarmaður um einkar athyglisverða persónu sem hann fóstrar innra með sér um þessar mundir. Þessi persóna, sem er enn nafnlaus, leit fyrst dagsins ljós þegar Davíð Þór fór ásamt fleiri íslenskum tónlistarmönnum til New York til þess að spila í opnunarteiti hjá tískuhúsi Luis Vuitton.

„Þegar ég vissi að ég væri að fara að spila fyrir allt þetta smarta fólk þá fór ég til Kormáks og Skjaldar og fékk þar dragfín jakkaföt og stíliseruð gleraugu við hæfi. Ég nota ekki gleraugu en það gerir hann og þau fara honum sérstaklega vel. Við þessa umbreytingu birtist þessi magnaði óstöðvandi karakter. Fötin, gleraugun og síðast en ekki síst allt þetta Louis Vuitton snobberí kölluðu hann fram í dagsljósið. Hann er þannig afsprengi snobbmenningarlegs sjokks og líf hans er mótað af því.“

Davíð Þór leggur áherslu á að þessi persóna lifi í samræmi við sköpunarsögu sína; sé ávallt vel klædd, kunni sig einkar vel á mannamótum og þá sérstaklega innan um konur. „Hann er bara svo skemmtilegur og sjarmerandi. Strax við fæðingu stökk hann til og byrjaði að búa til syrpu og það er hans form. Hann býr til Abba-syrpur og Queen-syrpur og hreinlega geysist áfram í tónlistinni en á sama tíma skeytir hann lítið sem ekkert um texta. Þeir einfaldlega skipta hann ekki máli svo hann býr bara til sína eigin án fyrirhafnar.“

En þessi ágæta persóna er þó ekki með öllu gallalaus þar sem Davíð segir að það sé í raun ekki hægt að ræða við hann málin í ró og næði, slíkt sé einfaldlega utan hans persónu. „En hann hefur engu að síður ákaflega skýran tilgang. Hann hentar t.d. mjög vel í veislur og til þess að hrista upp í leiðinlegum fundum. Sjáðu bara fyrir þér tíu karla í jakkafötum á samráðsfundi eða í einhverjum svona leiðinlegum peningabissness, það er eitthvað sem hann getur gefið líf og lyft á hærra plan.“