Eitt karlavígi á eftir að falla

Valgerður Sverrisdóttir tók við utanríkisráðuneytinu í gær af Geir H. Haarde og er því fyrsta konan til að gegna embættinu. Hún lét þau orð falla að nú væri forsætisráðuneytið eina ósigraða karlavígið.

Ég er náttúrlega stolt yfir að vera fyrsta konan sem er utanríkisráðherra og auðvitað er það ánægjulegur atburður, að mati okkar kvenna allavega. Konur eru að fikra sig áfram og það eins í pólitíkinni.

Valgerður býst ekki við áherslubreytingum í ráðuneytinu. Í utanríkismálum er það yfirleitt þannig að formenn beggja stjórnarflokka taka sameiginlegar ákvarðanir, sagði nýi utanríkisráðherrann.