Hægt að lækka matvælaverð

Hægt er að lækka matvælaverð á Íslandi með því að afnema tolla og höft á innfluttum matvælum, að mati aðjúnkts við Háskólann í Reykjavík. Hann segir einnig að matvælaverð myndi lækka ef Íslandi gengi í Evrópusambandið. Þetta kom fram á fundi Samtaka verslunar og þjónustu og Félags viðskipta- og hagfræðinga í morgun.

Fundurinn sem haldinn var á Grand Hóteli var fjölsóttur. Frummælandi var Valerður Sverrisdóttir iðnaðarráðherra. Hún sagði í ræðu sinni að allar ríkisstjórnir hafa stutt landbúnað og því yrði að fara vel yfir stöðu mála og fá alla sem að málinu standa til að taka þátt í umræðu um lækkun matvælaverð.

Dr. Jón Þór Sturluson forstöðumaður rannsóknarseturs verslunarinnar, Bifröst, sagði bændur fá 15-17 milljarða í styrki á ári og benti á að lausn á vandanum færi jafnvel að finna í tilfærslu á styrkjum með því að hætta að veita framleiðslustyrki og taka frekar upp beingreiðslur til bænda. Hann benti einnig á að mikilvægt væri í umræðunni um matvælaverð að muna að landbúnaðurinn er að hluta til atvinnugrein og að hluta til menningarstefna.

Aðalsteinn Leifsson aðjúnkt við Háskólann í Reykjavík var einn þeirra sem fluttu erindi á fundinum. Hann sagði hagkvæmast að gera róttækar breytingar á á kerfinu. Hann tók einnig fram að það sem væri hagkvæmast væri ekki endilega pólitískt mögulegt

Aðalsteinn kom einnig inn á að aðild að Evrópusambandi myndi lækka matvælaverð um 12 - 14% en skoða þyrfti þann möguleika í víðara samhengi. Íslendingar verða að hans mati að íhuga hvaða hagsmunir þeir eiga að gæta þegar aðild er skoðuð. Hann telur óráðlegt að afrskifa algjörlega aðild.

Valgerður Sverrisdóttir vildi ekki ganga svo langt að afnema alla tolla einhliða eða afnema styrki til landbúnaðar. Verndartollar verða hins vegar afnumbdir að hennar mati en gefa þurfi sér tíma til að skoða alla fleti málsins og það ætti að gera í samvinnu við alla sem hagsmuna eiga gæta.