Íslandsmeistarinn í blómaskreytingum karlkyns

Eini karlkyns þátttakandinn í Íslandsmeistarakeppninni í blómaskreytingum bar sigur úr býtum í keppninni sem fram fór í Hveragerði í dag. Einnig voru þar afhent Garðyrkjuverðlaunin fyrir árið 2006 og Umhverfisverðlaun Hveragerðisbæjar.

Í dag var opið hús í gamla Garðyrkjuskóla ríkisins við Hveragerði, sem nú er orðinn hluti af Landbúnaðarháskóla Íslands, en dagskráin var hluti af 60 ára afmælishátíð Hveragerðisbæjar. Margt var um manninn, enda blíða í lofti þennan fyrsta dag sumarsins. Forsetahjónin voru á svæðinu en forsetinn afhenti meðal annars fulltrúum Dvalarheimilisins Áss í Hveragerði Umhverfisverðlaun bæjarins árið 2006.

Einnig voru Garðyrkjuverðlaunin fyrir þetta árið afhent sem að þessu sinni féllu í skaut Hermanns Lundholms, en hann starfaði sem garðyrkjuráðunautur hjá Kópavogsbæ um árabil.

Þá hlaut Steinar Björgvinsson verðlaun fyrir fyrsta sætið í Íslandsmeistarakeppninni í blómaskreytingum, en hann var eini fulltrúi karlpeningsins af ellefu keppendum. Steinar var reyndar að verja titilinn því hann vann hann einnig árið 2004, en keppnin er aðeins haldin annað hvert ár.