Margmenni í moskum á helgustu nótt Ramadan

Rúmlega 175 þúsund múslimar komu saman í Al Aqsa-moskunni í Jerúsalem í nótt til að biðjast fyrir á þessari helgustu nótt föstumánaðarins Ramadan. Al Qadr nóttin er opinbera tímasetningin á því þegar spámanninum Múhameð var birtur Kóraninn, helgirit múslima.

Fjöldi Palestínumanna freistaði þess að komast frá Betlehem yfir til Jerúsalems, til Al Aqsa moskunnar en ísraelskir hermenn neituðu aðgangi öllum palestínskum karlmönnum undir 45 ára aldri og konum undir 40 ára aldri.