Tekur upp Hollywood-hasarmynd í Berlín

Þetta verður hasarmynd í anda Speed og Twister, mynd eins og hann er þekktur fyrir að gera, segir kvikmyndatökumaðurinn Óttar Guðnason sem ráðinn hefur verið til starfa við næstu kvikmynd leikstjórans Jan de Bont.

Jan de Bont er kunnur hasarmyndaleikstjóri og þekktustu myndir hans eru áðurnefndar Speed og Twister auk fyrstu Tomb Raider-myndarinnar. De Bont hóf feril sinn sem kvikmyndatökumaður og þekktustu myndir hans á þeim vettvangi eru Die Hard, Basic Instinct og Leathal Weapon 3.

Óttar hefur unnið mikið með Jan de Bont síðustu tvö ár við gerð auglýsinga. Við höfum gert aragrúa af auglýsingum. Síðast vorum við að klára Citröen-auglýsingu með Sean Connery í aðalhlutverkinu, segir Óttar.

Kvikmyndin sem Óttar mun taka upp heitir Stopping Power og er bandarísk framleiðsla þó upptökur fari fram í Berlín. Aðspurður segir Óttar að tilkynnt verði um val á leikurum á næstu vikum, fjögur þekkt nöfn verða í aðalhlutverkunum en aukahlutverkin skipa Þjóðverjar og aðrir Evrópubúar.

Þetta leggst auðvitað mjög vel í mig enda er þetta frábært tækifæri að fá að taka þátt í mynd af þessari stærðargráðu. Þarna stígur maður með aðra löppina inn í þennan Hollywood-heim hvað sem svo gerist, segir Óttar. Undirbúningur fyrir tökurnar hefst í byrjun ágústmánaðar og stendur í fimm vikur. Sjálfar tökurnar hefjast svo 13. september og klárast í lok nóvember að sögn Óttars. Hann veit ekki hvað tekur við hjá sér eftir það.

Þetta er eins langt og maður sér fram í tímann í mínum heimi. Ég býst við því að fara aftur í auglýsingarnar eftir þetta. Hins vegar er því ekki að neita að þessi mynd gæti verið vísbending um fleiri störf úti. Maður er allavega strax byrjaður að finna fyrir smá fídbakki frá Hollywood, segir Óttar sem hefur eytt síðustu tveim vikum í að helluleggja við hús sem hann var að byggja sér í Garðabæ. Það hefur verið fínt að vinna við húsið til að hreinsa hugann. Nú getur maður aftur farið að snúa sér að bíópælingunum.