Skjótráðir stjórnmálamenn gerðu jafntefli við stórmeistara

Sjaldan hafa stjórnmálamenn sést taka ákvarðanir jafnhratt og í húsi Taflfélags Reykjavíkur í dag. Nýtt landslið Íslands í skák skoraði á nokkra borgarfulltrúa og alþingismenn í hraðskák. Að veði var sæti í landsliðinu.

Nýtt landslið Íslendinga í skák var kynnt en það mun keppa fyrir Íslands hönd á Ólympíumótinu í skák sem hefst í Tórínó nú á laugardaginn og stendur til 4. júní. Landsliðinu barst óvæntur liðsauki þegar Jóhann Hjartarson, stigahæsti stórmeistari Íslendinga frá upphafi ákvað að ganga til liðs á ný.

Jóhann hefur ekki keppt á Ólympíumóti í tíu ár og átta ár eru síðan hann keppti á móti í fullri lengd. Hann segist ekki vera í jafn góðu formi nú og þegar hann stóð á hátindi ferilsins en segist þó vonast til að verða landsliðinu að gagni og efast blaðamaður ekki um að gagnið verði mun meira en hinn hógværi Jóhann Hjartarson vill vera af að láta.

Til að hita sig upp fyrir Ólympíumótið bauð landsliðið stjórnmálamönnum úr ýmsum áttum til hraðskákar, þar mættu borgarfulltrúar, alþingismenn og einn ráðherra. Guðfríður Lilja Grétarsdóttir, forseti Skáksambands Íslands lagði sæti landsliðsmannanna að veði ef einhver stjórnmálamannanna næði sigri. Reynslan af refskák stjórnmálanna nýttist pólitíkusunum vel, því tveir þeirra náðu jafntefli við stórmeistarana. Halldór Blöndal gerði jafntefli við Þröst Þórhallsson og Geir Haarde utanríkisráðherra hafði betri stöðu og betri tíma þegar hann samdi um jafntefli við Jóhann Hjartarson. Það verður þó að fylgja sögunni að stjórnmálamennirnir fengu talsverða forgjöf, þeir höfðu fimm mínútur til að hugsa gjörðir sínar en landsliðsmennirnir aðeins eina mínútu til umráða.