Samkynhneigðir megi giftast í New Jersey

Hæstiréttur í New Jersey úrskurðaði í gær á þann veg að samkynhneigðum skuli heimilt að giftast í ríkinu. Dómstóllinn fól löggjafanum að breyta lögum í þessa veru en setti þeim 180 daga frest.

New Jersey er þar með annað ríkið í Bandaríkjunum til að leyfa fólki af sama kyni að ganga í hjónaband, á eftir Massachusetts sem leyfði þetta árið 2004. Þrír af sjö dómurum greiddu atkvæði á móti tillögunni, þar sem þeir vildu að tillagan gengi lengra og veitti samkynhneigðum enn meiri réttindi. Mikil fagnaðarlæti brutust út meðal samkynhneigðra og stuðningsmanna þeirra þegar fréttist af úrskurðinum.