Everton marði Peterborough

Everton vann í kvöld nauman sigur á þriðjudeildarliði Peterborough í annari umferð enska deildarbikarsins. Það var varamaðurinn Tim Cahill sem tryggði úrvalsdeildarliðinu sigur með marki á 87. mínútu. Úrvalsdeildarliðin sem voru í eldlínunni í kvöld lentu fleiri í vandræðum.

Úrvalsdeildarliðið Wigan steinlá fyrir Crewe á útivelli 2-0, Portsmouth lagði Mansfield 2-1 á útivelli, Sheffield United lagði Bury 1-0, Bolton lagði Walsall 3-1 á útivelli eftir að staðan var 1-1 þegar skammt var til leiksloka og skoraði Nicolas Anelka þriðja mark Bolton.

Þá lagði Charlton Carlisle 1-0, en Brynjar Björn Gunnarsson og félagar í Reading lentu í miklum vandræðum á heimavelli sínum með lið Darlington, en þar náðu heimamenn að jafna metin í 3-3 skömmu fyrir leikslok og eru manni fleiri í framlengingu. Leikur Watford og Accrington er sömuleiðis í framlengingu eftir að markalaust var að loknum venjulegum leiktíma.