Ríkið græðir á bensínhækkunum

Essóstöðvarnar riðu á vaðið í morgun og hækkuðu verð á bensíni. Hinar stöðvarnar hafa nú fylgt á eftir og kostar lítrinn tæpar 133 krónur í sjálfsafgreiðslu. Framkvæmdastjóri FÍB segist óttast frekari hækkanir.

Olíufélagið Essó hækkaði verð á bensínlítra um þrjár krónur og og áttatíu aura í morgun og kostar þá lítrinn í sjálfsafgreiðslu 132 krónur og 80 aura. Verð á díselolíu var einnig hækkað um tvær krónur.

Bensínstöðvarnar virðast hafa beðið í lengstu lög með að hækka bensínverðið, en miklar hækkanir hafa verið á olíu erlendis.

Samkvæmt upplýsingum frá Runólfi Ólafssyni, framkvæmdastjóra Félags íslenskra bifreiðaeigenda, hefur útsöluverð á bensíni aldrei verið hærra. Verð á olíutunnu í dollurum er einnig með því hæsta sem verið hefur, en í nokkra daga í haust var bensínverð hærra en nú í dollurum talið. Hagstætt gengi gerði það hins vegar að verkum að bensínverð á íslandi var lægra en það er nú.

Runólfur segist hissa á að stjórnvöld hafi ekki gripið til neinna aðgerða til að verja neytendur fyrir þessum gríðarlegu hækkunum. Ríkið leggi virðisaukaskatt á bensín og því hafi stjórnvöld grætt á hækkun bensínverðs. Með endurskoðun á skattlagningu og olíugjöldum gæti ríkisstjórnin lækkað bensínverð og með því vísitölu neysluverðs og verðbólguna.

Stærstu bensínstöðvarnar hafa nú hækkað verð á bensíni til jafns við Essó, bæði Shell og Olís. Bensínlítrinn fæst þó enn á tæpar 128 krónur hjá Atlantsolíu, Orkunni og ÓB bensíni.