Nilfisk hótar Nilfisk lögsókn

Meðlimir Stokkseyarbandsins Nilfisk, eiga yfir höfði sér lögsókn að hálfu ryksuguframleiðandans Nilfisk. Ryksugurisinn krefst þess að hljómsveitin samnefnda breyti heiti sínu og að allur varningur hennar verði gerður upptækur.

Piltarnir í hljómsveitinni Nilfisk urðu Íslendingum fyrst að góðu kunnir árið 2004 en þá hituðu þeir upp fyrir bandarísku hljómsveitina Foo Fighters kunn er um alla veröld. Tildrög þessa voru þau að söngvari Foo figthers, David Grohl, fyrrverandi trommari Nirvarna, gekk á hljóðið af æfingu drengjanna í nærliggjandi skúr eftir kvöldverð sinn á Stokkseyri. Atburðurinn vakti mikla athygli og á vafalaust stóran þátt í þeirri athygli sem drengirnir hafa fengið.

En nú hefur annar risi sýnt Stokkseyrarbandinu áhuga, að þessu sinni ryksuguframleiðandinn Nilfisk. Fyrirtækið hótar drengjunum lögsókn breyti þeir ekki nafni sínu og innkalli varning sinn. Samskipti hljómsveitarmeðlima við Nilfisk umboðið á Íslandi hafa þó verið með miklum ágætum enda hefur sala á þessum sögufrægu ryksugum aukist samhliða auknum vinsældum drengjanna frá Stokkseyri.