Mínúturnar á milljónir króna

Það eru Íslendingar sem framleiða það efni sem selst hraðast í heiminum í dag. Í grein danska blaðsins Politiken er fjallað ítarlega um Latabæjarþættina og sagt að það kosti sextíu og tvær milljónir að framleiða hvern þátt, eða tvær komma sex milljón krónur mínútan.

Íslensk eróbikstjarna selur gulrætur og góða siði í sjónvarpsþætti fyrir börn, þannig er Latabæjarþáttunum lýst í blaðagrein danska blaðsins Politiken sem birtist á föstudaginn. Þar er fjallað ítarlega um þættina og sagt að þeir séu það barnaefni sem seljist hraðast í heiminum í dag.

Þættirnir hafa verið teknir til sýninga í nítíu og sex löndum og í ágúst bætast við Danmörk og Finnland.

Hópur fjölmiðlafólks kom fyrir stuttu frá Norðurlöndunum hingað til lands til að kynna sér framleiðslu þáttanna. Áhugi erlendra blaðamanna á þáttunum hefur verið að aukast mjög og í fyrra kom meðal annars til landsins fjölmiðlafólk frá Suður-Ameríku en þættirnir hafa notið mikilla vinsælda þar.

Í grein Politiken er þáttunum lýst þannig að þeir séu byggðir upp á pólitískri rétthugsun og margt uppbyggilegt megi finna í þeim

Í greinninni er jafnframt sagt að kostað hafi eitt hundrað og sjötíu milljónir danskra króna að framleiða fyrstu þrjátíu og fimm þættina af Latabæ. Þetta samvarar tveimur komma tveimur milljörðum íslenskra króna. Sem þýðir að framleiðslukostnaður við hvern þátt hafi verið sextíu og tvær milljónir króna og hver mínúta hafi því kostað tvær komma sex milljónir króna.

Forsvarsmenn fyrirtækisins segja tölurnar líklega heldur of háar. Nær lagi sé að heildarkostnaður sé einn komma sjö milljarðar króna. Sem þýðir að hver þáttur kostar fjörtíu og níu milljónir króna í framleiðslu og hver mínúta tvær milljónir.

Hafa ber í huga að um er að ræða fyrstu þættina og því ákveðinn byrjunarkostnaður sem fylgir.

Áhugasamir Danir fá svo tækifæri til að fylgjast með íþróttaálfinum, Sollu stirðu og öllum hinum á sjónvarpsstöðinni TV 2 í ágúst

Unnið er nú að framleiðslu átján nýrra þátta og lýkur upptökum á þeim í ágúst.