Danir ætla að styðja tillögu um hvalveiðar í atvinnuskyni

Danir, og þar með Færeyingar og Grænlendingar, ætla að styðja tillögu um að leyfa á ný hvalveiðar í atvinnuskyni, á ársfundi Alþjóðahvalveiðiráðsins, sem hefst á föstudaginn kemur.

Per Stig Möller, utanríkisráðhera Danmerkur, segir að skynsamlegra sé að heimila sjálfbærar hvalveiðar undir ströngu eftirliti, en að hvalveiðiþjóðir segi sig úr Hvalveiðiráðinu og fari sínu fram að eigin vild. Það eru Japanar, sem ætla að leggja tillöguna fram, en þeir, eins og Íslendingar, stunda hvalveiðar í vísindaskyni. Talið er að nú verði í fyrsta sinn, síðan hvalveiðibann var ákveðið l986, meirihluti fyrir því að leyfa veiðar í atvinnuskyni. Hann verði hins vegar naumur en tvo þriðju atkvæða þarf til að fá tillöguna samþykkta. Japanar hafa látið í veðri vaka að ef tillagan verði felld, muni þeir segja sig úr Hvalveiðiráðinu og stunda veiðar að eigin geðþótta. Sem fyrr leggjast fulltrúar Bandaríkjamanna, sem þó eru hvalveiðiþjóð, hart gegn tillögum um veiðar í atvinnuskyni, og sú andstaða vegur þungt á alþjóðavettvangi.