Óásættanlegt að Bandaríkin standi utan við Kyoto-sáttmálann

Forstöðumaður Jarðarstofnunar Kólumbíuháskóla í Bandaríkjunum segir óásættanlegt að Bandaríkin skuli standa utan við Kyoto-sáttmálann. Þetta sagði hann eftir undirritun samstarfs við Háskóla Íslands um rannsóknir á sviði loftslagsbreytinga.

Svokallað samráðsþing um loftslagsbreytingar hefur farið fram á Nordica Hóteli í gær og í dag. Þingið er ný tegund samstarfs milli leiðandi fyrirtækja, stofnana og vísindamanna og hefur að markmiði að takast á við loftslagsbreytingar og framtíð orkubúskapar á jörðinni.

Forsvarsmenn Háskóla Íslands og Kólumbíaháskóla í Bandaríkjunum undirrituðu í dag viljayfirlýsingu um samstarf skólanna, meðal annars varðandi rannsóknir á sviði loftslagsbreytinga og nýtingu endurnýjanlegrar orku, auk þess sem samstarfið nær til miðlunar náms- og kennsluefnis og stúdentaskipta. Rektor Háskóla Íslands, Kristín Ingólfsdóttir, sagði að lokinni undirrituninni að hún væri eðilegt framhald á samstarfi skólanna sem staðið hafi í nokkurn tíma.

Forstöðumaður Jarðarstofnunar Kólumbíuháskóla, Jeffrey D. Sachs, sem nefndur hefur verið einn af 100 áhrifamestu mönnum heims af tímaritinu Time, skrifaði undir samninginn fyrir hönd bandaríska skólans.

Í samtali við fjölmiðla að lokinni undirrituninni kom Sachs inn á Kyoto-sáttmálann um verndun umhverfisins sem Bandaríkjamenn neita að vera aðilar að. Hann sagði að Bandaríkin verði að koma aftur að samstarfi alþjóðasamfélagsins í umhverfismálum því núverandi staða sé óásættanleg. Indland og Kína verði einnig að horfa björtum augum til framtíðar og allir aðilar verði að líta þannig á málið að um sameiginlega hagsmuni allra sé um að ræða.