Heimilar veiðar á 50 hrefnum á árinu

Sjávarútvegsráðuneytið hefur gefið leyfi til veiða á fimmtíu hrefnum í vísindaskyni og hefjast veiðarnar væntanlega á næstu dögum. Veiðarnar undanfarin ár virðast ekki hafa haft merkjanleg áhrif á ferðamannastraum hingað til lands.

Hrefnuveiðarnar sem leyfðar voru í dag eru liður í hvalrannsóknaáætlun Hafrannssóknastofnunarinnare sem lögð var fyrir vísindanefnd Alþjóðahvalveiðiráðsins árið 2003. Veiðar hafa farið fram síðustu þrjú sumur hafa um 100 hrefnur þegar veiðst en stefnt er að því að veiða alls 200 hrefnur í vísindaskyni.

Starfsmenn Hafrannsóknarstofnunarinnar eru nú í startholunum og bíða þess að sæmilega viðri til veiðanna. Að sögn Droplaugar Ólafsdóttur, sérfræðings á nytjastofnasviði Hafró, fara veiðarnar fram allt í kringum landið líkt og undanfarin ár. Meginmarkmiðið með veiðunum er að rannsaka fæðuvistkerfi hrefnunnar, en vísbendingar eru um að nytjafiskar séu stærri hluti af fæðu hrefnunnar en áður hefur verið talið.

Hvalrannsóknaáætlun Hafró gerir einnig ráð fyrir veiðum á 200 langreyðum og 100 sandreyðum en engin ákvörðun hefur verið tekin um hvort og þá hvenær þær veiðar hefjast.

Samtök ferðaþjónustunnar hafa undanfarin ár varað við að hvalveiðarnar geti hugsanlega haft áhrif á ferðamannastraum hingað til lands. Að sögn Jóns Karls Helgasonar, stjórnarformanns samtakanna, hafa veiðarnar undanfarin ár þó ekki haft merkjanleg áhrif á komu ferðamanna, en hvalaskoðun er orðið eitt helsta aðdráttarafl ferðaþjónustunnar hér á landi. Jón Karl segir að umræðan um veiðarnar hafi verið hávær við upphaf þeirra árið 2003 en minna hafi farið fyrir henni í fyrra enda hafi ferðaþjónustan og Hafró reynt að vinna saman í málinu. Jón Karl bendir hins vegar á að það atvinnuveiðar geti haft meiri áhrif ef ráðist verði í þær á næstu árum.