Atlantsskip leigja gámaskip

Atlantsskip hafa tekið á leigu nýtt skip vegna mikillar aukningar í flutningum félagsins bæði á Evrópu- og Ameríkuleiðum. Hið nýja skip nefnist Camira. Fyrsta hlutverk þess verður að létta á miklum Evrópuflutningum sem eru í bígerð hjá Atlantsskipum en síðan fer það í siglingar fyrir félagið á milli Íslands og Ameríku.

Camira er 375 gámaeiningar að stærð. Nýja skipið tvöfaldar flutningsgetu Atlantsskipa á milli Íslands og Evrópu og þegar það hefur verið tekið til notkunar í Ameríkusiglingum félagsins mun það leiða til næstum þreföldunar í flutningsgetu Atlantsskipa á þeirri leið. Fyrir í flota Atlantsskipa eru Arnarnes og Kársnes sem sigla á Evrópuleið og Geysir á Ameríkuleið.