Mönnum bjargað úr Seley

Björgunarsveitarmenn voru sendir á björgunarskipi Landsbjargar frá Neskaupstað í gærkvöldi til að aðstoða tvo menn sem voru í erfiðleikum við Seley, sem  er lítil eyja austur af Reyðarfirði, en þá var farið að brima við eynna.

Annar mannanna var í eynni en hinn í litlum gúmmíbáti sem ekki komst að eynni til að sækja hann vegna brims. Fyrst var manninum bjargað úr bátnum og síðan var línu skotið í land til hins, sem gat dregið að sér björgunarbát, sem aftur var dreginn með honum út í skipið og varð hvorugum meint af. Þeir munu hafa verið að huga að æðarvarpi, þegar veðrið versnaði skyndilega.