Slökkvilið að störfum djúpt inni í fjalli

Eldur kom upp í 420 metra háum fallgöngum Kárahnjúkavirkjunar nú síðdegis og er slökkvilið þar að störfum djúpt inni í fjalli. Menn eru ekki taldir í hættu.

Ljóst er að slökkvistarf er unnið við óvenjulegar aðstæður enda eru fallgöngin þau hæstu sinnar tegundar í heimi, um 420 metra há. Þau eru grafin inn í Teigsbjarg og þurftu slökkviliðsmenn að fara um einn kílómetra inn að stöðvarhússhvelfingunni til að komast að fallgöngunum. Samkvæmt upplýsingum Sigurðar Arnalds hjá Landsvirkjun er talið að eldurin hafi kviknað í rafmagnsköplum og vegna rafmagnsbilunar. Mikill reykur myndaðist við það í göngunum en ekki er talið að menn séu í hættu. Þýskt fyrirtæki vinnur við að stálfóðra göngin.