Alþjóðlegt þing um loftslagsbreytingar á Nordica

Ísland er fyrirmyndarland í orkumálum, sagði Ólafur Ragnar Grímsson, forseti Íslands, í opnunarræðu sinni á þingi um loftslagsbreytingar sem nú stendur yfir á Hótel Nordica. Ólafur Ragnar fjallaði um mikilvægi umræðu um loftslagsbreytingar. Hann sagði Íslendinga sanna það að hægt væri að breyta hratt venjum hvað varðar orkuneyslu. Íslendingar hefðu kynt hús sín með kolum fyrir rúmlega hálfri öld en nú væri Ísland orðið fyrirmyndarland í orkumálum.

Ólafur Ragnar hefur undanfarið beitt sér fyrir umræðu um loftslagsbreytingar og átti hann upphafið að stofnun samráðsþingsins ásamt dr. Jeffrey Sachs, hagfræðingi Jarðarstofnunarinnar. Þingið mun starfa í þrjú ár, en fundir verða haldnir tvisvar á ári.

Umræðuþingið sitja fulltrúar vísindastofnana, stórfyrirtækja og alþjóðasamtaka um allan heim auk sendinefnda frá orkufreku ríkjunum Kína og Indlandi. Forsetinn sagðist binda miklar vonir við árangur af samræðum sem þessum þar sem allir aðilar gerðu sér grein fyrir alvarleika ástandsins og leituðu lausna.