Ríkisstjórn Geirs Haarde tekur við á fimmtudaginn

Formenn Framsóknar- og Sjálfstæðisflokks tilkynntu um breytingar á ríkisstjórninni í dag, en ríkisstjórnin verður undir forystu Geirs Haarde og hverfur Halldór úr ráðherrastól. Valgerður Sverrisdóttir verður utanríkisráðherra í ríkisstjórninni og Jónína Bjartmarz tekur við umhverfisráðuneyti. Jón Kristjánsson, hættir sem félagsmálaráðherra og tekur Magnús Stefánsson við þeim stóli. Þá sækja framsóknarmenn Jón Sigurðsson í Seðlabankann og tekur hann við Viðskipta- og Iðnaðarráðuneytinu. Breytingar hjá Sjálfstæðismönnum eru ekki aðrar en þær að Sigrður Anna þórðardóttir hættir sem umhverfisráðherra og Geir tekur við forsætisráðuneytinu.

Ríkisstjórn Geirs Haade tekur formlega við á ríkisráðsfundi á fimmtudaginn. Þá taka nýir ráðherrar við embættum sínum. Valgerður Sverrisdóttir, verðandi utanríkisráðherra, segir varnarmálin verða mikilvægasta verkefnið sem bíði hennar.

Guðni Ágústsson, varaformaður Framsóknarflokksins, verður áfram landbúnaðarráðherra í stjórn Geirs, og sagði í samtali við NFS í dag að hann hefði ekki sóst eftir öðru ráðherraembætti.

Jón Kristjánsson, fráfarandi félagsmálaráðherra, segist hverfa úr ráðherrastól að eigin ósk og ekki ætla að bjóða sig fram til þingmennsku næsta vor.