Metár hjá Nordjobb hér á landi

Aldrei hafa jafn margir komið til Íslands á vegum Nordjobb verkefnisins. 140 einstaklingar koma hingað til lands til vinnu í sumar og er þetta því metár hjá Nordjobb. Til samanburðar voru 96 norrænir starfsmenn hér á landi í fyrra á vegum Nordjobb.

Nordjobb er samstarfsverkefni milli Norðurlandanna sem útvegar ungu fólki á aldrinum 18-28 ára sumarstörf í nágrannalöndunum. Verkefnið hefur verið starfrækt síðan 1985 og er sumarið í ár því 21. sumarið.

Íslenskir vinnuveitendur hafa tekið gríðarlega vel í að fá til sín norræna starfskrafta og jafnvel hefur reynst nokkuð erfitt að manna stöðurnar sem voru í boði. Á höfuðborgarsvæðinu vinna flestir við garðyrkju og umönnun en úti á landi starfa flestir á hótelum eða sveitabæjum. Skemmtidagskrá verkefnisins samanstendur m.a. af fjallgöngum, ferðalögum, íslenskunámskeiði og kvikmyndakvöldi.