Bóluefni líklega skráð hér á landi um áramót

Nýtt bóluefni gegn leghálskrabbameini verður að öllum líkindum skráð hér á landi um næstu áramót. Bóluefnið getur haft mikla þýðingu fyrir konur framtíðarinnar.

Yfirvöld í Bandaríkjunum heimiluðu notkun á bóluefninu í gær og líklegt þykir að leyfi fáist fyrir því á Íslandi sem og annars staðar í Evrópu um næstu áramót. Bóluefnið ber heitið Gardasil og virkar á um 70 prósent þeirra veirustofna sem valda leghálskrabbameini en árlega greinast 15 til 18 konur með leighálskrabbamein á Íslandi og hátt í 1500 konur með forsstigsbreytingar.

Haraldur Briem sóttvarnalæknir segir bóluefnið koma í veg fyrir svokallaðar vörtuveirusýkingar sem menn viti núna að valdi leghálskrabbameini. Það megi segja að þetta sé meðal fyrstu bóluefna nota megi til að koma í veg fyrir krabbamein. Aðspurður segir Haraldur bóluefnið stórt skref fyrir konur þótt leghálskrabbamein sé ekki eitt af algengustu krabbameinum sem konur fái, en ungar konur séu líklegri til að fá það.

Enn hefur ekki verið tekin ákvörðun um hvernig bóluefnið verður notað hér á landi né hvenær það verður tekið í notkun. Haraldur segir að menn verði að átti sig á því hvenær eigi að gefa bóluefnið, hvort stelpur og strákar eigi að fá það og hvort taka eigi það inn í ungbarnabólusetningu. Einnig þurfi að meta kostnaðinn við að taka upp bólusetninguna.