Akstur undir áhrifum og kynferðisleg áreitni í Héraðsdómi í dag

Héraðsdómur Reykjavíkur dæmdi í dag konu í tveggja mánaða fangelsi og til greiðslu 100.000 kr. sektar fyrir að aka undir áhrifum áfengis. Brot konunnar voru ítrekuð en hún var án ökuréttinda eftir að hafa verið svipt þeim fyrir fyrri ölvunarakstur. Einnig dæmdi héraðsdómur mann til greiðslu 600.000 króna sektar fyrir að aka undir svo miklum áhrifum amfetamíns að hann var ófær um að stjórna bifreiðinni.

Karlmaður var sýknaður af ákæru um kynferðisbrot gegn stúlku. Stúlkan var farþegi í bíl mannsins á leið frá Akureyri til Reykjavíkur, en hún hafði ásamt stöllum sínum strokið af meðferðarheimili. Maðurinn var sagður hafa áreitt stúlkuna, klipið í brjóst hennar og þreifað á kynfærum hennar innan og utan klæða auk þess að setja hönd hennar á getnaðarlim sinn. Maðurinn neitaði sök og hinar stúlkurnar tvær voru sofandi. Stúlkan þótti ekki nógu sannfærandi í framburði sínum og sekt ekki sönnuð á manninn.