Dæmdur í 5 ára fangelsi fyrir ýmis brot

Héraðsdómur Reykjavíkur dæmdi í gær Ólaf Hrafn Magnússon  í fimm ára fangelsi fyrir tilraun til manndráps, tvær sérstaklega hættulegar líkamsárásir, kynferðisbrot og vörslu barnakláms.

Ólafur barði mann  þangað til hann missti meðvitund  og stakk  mann í bakið á menningarnótt í fyrra . Einnig var han ákærður fyrir að hafa margoft haft samræði við stúlku sem þá var 12 og 13 ára og hafa tekið klámfengnar myndir af henni sem enduðu á Netinu.

Aðfaranótt 21. ágúst 2005, á bifreiðastæði á milli Tryggvagötu og Geirsgötu 19, stakk Ólafur Hrafn mann tvívegis í bakið með hnífi. Annað stungusárið var um 2 cm langt og lá innan við neðra horn hægra herðablaðs, en hitt var um 3 cm langt og lá utan við neðra horn hægra herðablaðs, náði í gegnum brjóstholsvegginn og var 3 - 4 cm langur og jafn djúpur skurður á hægra lunga og skárust í sundur slagæðar bæði í lunga og brjóstvegg, en áverkum þessum, sem voru lífshættulegir, fylgdi mikil blæðing innvortis og féll lunga hans saman.

Ólafur Hrafn er einnig dæmdur fyrir að hafa á tímabilinu frá 9. febrúar til 31. júlí 2004, á heimili sínu, í það minnsta á annan tug skipta, haft samræði við stúlku sem þá var 12 og 13 ára gömul og látið hana sleikja kynfæri sín.

Eins er Ólafur Hrafn dæmdur fyrir að haft í vörslum sínum á hörðum diski í tölvu, 30 ljósmyndir af stúlkunni sem hann beitti kynferðislegu ofbeldi, einni og þeim tveimur saman, ýmist fáklæddum eða nöktum sem sýndu hana á kynferðislegan og klámfengin hátt og hafa áður dreift afritum af myndunum, eða hluta þeirra, til annarra, með þeim afleiðingum að þær ganga manna í millum á internetinu.

Í niðurstöðu Héraðsdóms segir að Ólafur Hrafn sé ungur að árum og virðist hafa vilja til að taka sig á í lífinu. Þá hefur hann að hluta játað þau brot sem hann er nú sakfelldur fyrir. Á hitt ber og að líta að árás hans var að mestu tilefnislaus og hnífsstunguárásirnar ekki í neinu samhengi við það sem á undan var gengið enda þótt þær hafi átt sér stað í tengslum við átök tveggja hópa.

Þegar allt framangreint er virt, og með vísan til 77. gr. almennra hegningarlaga og jafnframt með hliðsjón af því að ákærði hefur ekki áður þurft að afplána refsingu, þykir refsing ákærða hæfilega ákveðin fangelsi í 5 ár. Til frádráttar refsingunni komi gæsluvarðhaldsvist ákærða frá 21. ágúst 2005 fram að dómsuppsögu með fullri dagatölu, að því er segir í niðurstöðu Héraðsdóms Reykjavíkur.