Engin sérstök náttúrufegurð í landinu sem sekkur!

Nú eru aðeins fjórir mánuðir í það að byrjað verði að safna vatni í lón Kárahnjúkavirkjunar og fer því hver að verða síðastur til að sjá það land sem fer á kaf. Valgerður Sverrisdóttir iðnaðarráðherra segir að engin sérstök náttúrufegurð sé í landinu sem hverfi undir lónið. Kárahnjúkastífla, stærsta mannvirki Íslands, er óðum að fá á sig mynd og vantar nú aðeins um 30 metra upp á að hún nái sinni endanlegu 200 metra hæð. Stíflan hefur það meginhlutverk að stöðva rennsli Jökulsár á Dal um sinn gamla farveg og mynda miðlunarlón fyrir innan, Hálslón, sem verður vatnsforðabúr Kárahjúkavirkjunar, en frá lóninu verður vatninu veitt um 40 kílómetra löng jarðgöng að stöðvarhúsi í Fljótsdal. Guðmundur Pétursson, yfirverkefnisstjóri Landsvirkjunar, segir stíflugerðina á áætlun og stefnt að því að byrjað verði að fylla í lónið í september í haust. Valgerður Sverrisdóttir iðnaðarráðherra var meðal gesta sem fóru um virkjunarsvæðið á dögunum. Hún segist fyrir löngu hafa gert það upp við sig að það sé réttlætanlegt að sökkva landinu sem fer undir Hálslón vegna þess framkvæmdin breyti miklu fyrir Austurland og landið í heild. Hún segir ekki sanngjarnt hvernig fólk meti þetta án þess að hafa séð svæðið. Það sé ekki hægt að tala um að það sé eitthvað sérstök náttúrufegurð sem fari undir lónið, þegar horft sé á landið í heild.