Órökstuddar dylgjur landlæknis

Á forsíðu Fréttablaðsins í dag segir landlæknir tengsl milli helstu lyfjainnflytjenda á landinu og tveggja keðja í smásölu lyfja vera ástæðu fyrir háu lyfjaverði hér á landi. Þessi fullyrðing er alfarið röng segir í tilkynningu frá Frumtaki - samtökum framleiðenda frumlyfja.

Hér á landi eru tvö stór innflutingsfyrirtæki á lyfjamarkaði fyrir frumlyf auk þess sem nokkur erlend lyfjafyrirtæki reka hér starfsstöð. Heildarsala þessara fyrirtækja nær til u.þ.b. 85% af sölu lyfja á Íslandi. Ekkert þessara fyrirtækja hefur eignatengsl við lyfsölukeðjurnar Lyfju eða Lyf og heilsu. Að auki er minnt á að lyfjaverð er ákveðið af Lyfjagreiðslunefnd, sem skipuð er af heilbrigðisráðherra, og á landlæknir sinn fulltrúa í þeirri nefnd.

Landlæknisembættið er eitt virðulegasta embætti landsins og nýtur trausts almennings. Það er ekki trúverðugt, þegar landlæknir fellur í þá gryfju að fara fram með órökstuddar dylgjur sem þessar. Af orðum landlæknis má jafnvel ráða að um ólögmætt athæfi sé að ræða. Frumtök harma málflutning sem þennan og vænta þess að landlæknir færi rök fyrir þessum ummælum sínum ella dragi þau til baka.