Háskólinn þarf 4,9 milljarða til að verða meðal þeirra bestu

Heildartekjur Háskóla Íslands þurfa að aukast um tæpa fimm milljarða til að skólinn geti náð í hóp hundrað bestu skóla í heimi. Fjármagnið yrði notað til eflingar doktorsnáms og rannsóknavinnu við skólann. Leiðin í hóp hinna bestu var mörkuð í háskólanum í dag.

Vonast er til að aukin fjárveiting komi úr sjóðum ríkisins en einnig þarf skólinn að sækja í meiri sértekjur. Áætlað er að einn og hálfur milljarður komi frá fyrirtækjum, úr rannsóknasjóðum, auk þess sem vonast er til að skólinn geti fengið inn tekjur af endurmenntun. En til þess þurfa reglur um háskólann að breytast. Ekki hefur þó fengist vilyrði frá menntamálaráðherra fyrir reglubreytingum eða auknum fjárveitingum til Háskóla Íslands.

Til þess að vinna sig upp í hóp hundrað bestu háskóla í heimi, þarf Háskóli Íslands að útskrifa fleiri doktora, efla rannsóknastarf, fá fleiri greinar birtar í fræðiritum og fá fleiri fræðimenn á heimsmælikvarða til kennslu og rannsókna við skólann. Stefna skólans er að byggja á sérstöðu sinni í menningartengdum greinum eins og íslensku og norrænni sögu, auk jarðfræði, orkuvinnslurannsókna og annarra greina sem snúa að náttúru Íslands.