Loksins fullkomið fangelsi

Meðal þess sem gert verður til að taka á fíkniefnavanda í fangelsum, verður að koma upp meðferðardeild, þannig að spurn eftir fíkniefnum minnki.

Fangelsismálastjóri vonast til að áratugalangri byggingasögu nýs og fullkomins fangelsis, ljúki fljótlega.

Árið 1960 var gerð skýrsla að beiðni dómsmálaráðuneytisins um að koma fangelsismálum í nútímalegt horf hér á landi. Þar var gert ráð fyrir deildaskiptu fangelsi og árið eftir samþykkti Alþingi lög um ríkisfangelsi á þeim hugmyndum. Þrátt fyrir þann langa tíma sem liðinn er, bólar ekkert á fangelsinu. Reyndar var byrjað á því á Tunguhálsi fyrir rúmum 30 árum, en síðan ekkert meir. Til að mæta þörfinni hafa menn byggt við á Litla Hrauni. Fangelsismálastjóri er hins vegar bjartsýnn á að nú sjái fyrir endann á sögunni endalausu og að nútímalegt fangelsi rísi á Hólmsheiði áður en þessi áratugur er liðinn. Hann vonar að fjárveitingavaldið sýni málinu skilning. Eitt af því sem oft ber á góma þegar fanga og fangelsi eru til umfjöllunar, er ónóg sálgæsla í fangelsum og ofnotkun á fíkniefnum. Því vaknar sú spurning hvort ekki þurfi að setja fanga í meðferð þannig að spurnin eftir fíkniefnum í fangelsum minnki. Valtýr Sigurðsson fangelsismálastjóri segir að fangar séu oft í mjög slæmu ástandi vegna fíkniefnaneyslu þegar þeir koma til afplánunar, en að í nýja fangelsinu verði gert ráð fyrir afeitrun og meðferð, þannig að hægt verði að taka á vandanum með þeim hætti.