Línuhönnun hlaut umhverfisverðlaunin Kuðunginn

Það eru hreinar línur hjá ráðgjafa- og verkfræðistofunni Línuhönnun, en fyrirtækið hlaut í dag viðurkenningu umhverfisráðuneytisins, „Kuðunginn", fyrir að hafa umhverfissjónarmið að leiðarljósi í verkefnum sínum. Verðlaunin voru afhent í tengslum við hátíðar- og fræðslufund um endurnýtingar- og úrvinnslumál sem fram fór á Grand Hótel í tilefni Dags umhverfisins. Það var umhverfisráðherra, Sigríður Anna Þórðardóttir, sem afhenti forsvarsmönnum Línuhönnunar hinn forláta verðlaunagrip.

Verkfræðistofan Línuhönnun var stofnuð árið 1979 en snemma á níunda áratugnum fór fyrirtækið einnig að bjóða upp á viðhaldsráðgjöf. Mörg þekkt hús hafa verið á meðal viðfangsefna Línuhönnunnar, þar á meðal aðalbygging Háskóla Íslands, Þjóðminjasafnið og Bessastaðir. Fyrr á þessu ári fékk Línuhönnun umhverfisvottun samkvæmt svokölluðum ISO 14.001 staðli en fyrirtæki með slíka vottun hefur farið í gegnum ákveðið ferli sem felur í sér stefnumótun á sviði umhverfismála og ítarlega skoðun á hvaða umhverfisáhrif starfsemi fyrirtækisins hefur.

Kuðungurinn er veittur fyrirtækjum fyrir framlag þeirra til umhverfismála á liðnu ári og var viðurkenningin fyrst veitt árið 1994. Umhverfisráðherra skipar sérstaka úthlutunarnefnd árlega sem auglýsir eftir tilnefningum um fyrirtæki, sem vegna verka sinna og athafna er talið þess verðugt að hljóta Kuðunginn fyrir liðið ár. Nefndin fer yfir tilnefningarnar og heimsækir þau fyrirtæki sem hún telur helst koma til greina og sendir síðan tillögur sínar til ráðherra með rökstuðningi. Fulltrúar í nefndinni eru þrír, einn tilnefndur af Alþýðusambandi Íslands, annar af Samtökum atvinnulífsins og þann þriðja skipar umhverfisráðherra án tilnefningar.

Verðlaunagripurinn er að sjálfsögðu kuðungur og er nýr hannaður ár hvert af nýjum listamanni. Það er Ólöf Erla Bjarnadóttir leirlistamaður sem hannaði Kuðunginn að þessu sinni. Kuðungshafinn fær auk þess, í eitt ár frá því að Kuðungurinn er veittur, að nota sérstakt merki sem listamaðurinn Kristín Þorkelsdóttir hannaði.