Fjölmiðlafrumvarp beinist aðeins gegn 365

Gunnar Smári Egilsson, forstjóri Dagsbrúnar, segir nýtt fjölmiðlafrumvarp aðeins beinast gegn 365 miðlum og segir enga þörf á lögunum. Verði það að lögum leiði það til lakari fjölmiðla hér á landi.

Menntamálaráðherra kynnti í gær nýtt frumvarp um eignarhald á fjölmiðlum sem gert er ráð fyrir að samþykkt verði nú í vor. Þar er meðal annars kveðið á um að fyrirtæki megi ekki eiga meira en 25 prósenta hlut í útvarps- og sjónvarpsstöð sem hafi að minnsta kosti þriðjungs markaðashlutdeild.

Gunnar Smári Egilsson, forstjóri Dagsbrúnar, móðurfélags 365 sem rekur meðal annars NFS, segist ekki sjá þörfina fyrir lögin og segir að í frumvarpinu skíni í löngun til að leggja stein í götu eins fyrirtækis, 365. Hann spyr hverjum sé ástandið óþolandi og segist sjálfur telja að það sé fyrst og fremst þeim sem hafi talið sig hafa náð fullkomnu taki á íslensku fjölmiðlaumhverfi vorið 2002 þegar Fréttablaðið og Stöð 2 hafi verið að fara á hausinn og líklegt að eigendur DV og Skjás eins eignuðustu þau. Þá sætu menn uppi með það fyrirtæki, Árvakur og Ríkisútvarpið sem hafi verið og sé undir hæl Sjálfstæðisflokksins.

Gunnar Smári viðurkennir að eingarhald geti haft áhrif á málflutning og innihald fjölmiðla. Það sé mikilvægt að það megi vera þannig en hann sé ekki að segja að þannig sé það hjá 365. Það séu grundvallarmannréttindi fólks að gefa út blað í kringum tilteknar stjórnmálaskoðanir.

Þá heldur hann því fram að þreyta á Alþingi hafi valdið því að frumvarpið sé komið fram nú. Það sé innanhússvandi á þingi og þótt menn vilji sættast þar geti þeir farið í gufu eða eitthvað en það sé óþarfi að setja lög til að búa til sátt milli þeirra. Áhorfendur muni búa við minna úrval af fjölmiðlum ef lögin verði samþykkt og lakari fjölmiðla sömuleiðis. Á sama tíma eigi að efla Ríkisútvarpið til að að halda einkamiðlunum niðri.