Hámarksökutaxti leigubifreiða afnuminn

Áfrýjunarnefnd samkeppnismála hefur staðfest úrskurð Samkeppniseftirlitsins um að hámarksökutaxti leigubifreiða skuli afnuminn um næstu mánaðamót. Búist er við að flestar leigubílastöðvar sæki um undanþágu til þess að hafa samræmda gjaldskrá fyrir sína bíla.

Samkeppniseftirlitið úrskurðaði í febrúar að gjaldskrá leigubíla skyldi gefin frjáls frá og með 1. maí næstkomandi. Taldi eftirlitið meðal annars að með reglugerðabreytingu um að höfuðborgarsvæðið og Reykjanes yrði eitt atvinnu- og gjaldsvæði fyrir leigubíla hefði opnast tækifæri á samkeppni í greininni.

Þessu undi Félag íslenskra leigubifreiðastjóra ekki og taldi það óheillaspor fyrir neytendur að fella niður hámarkstaxta. Var meðal annars bent á að slík ráðstöfun hefði gefist illa í Svíþjóð og Noregi. Áfrýjunarnefnd samkeppnismála komst hins vegar að þeirri niðurstöðu að samræmdir hámarkstaxtar færu gegn meginmarkmiðum samkeppnislaga og því var ákvörðun Samkeppniseftirlitsins.

Hjalti Hafsteinsson, stjórnarmaður í Bifreiðarstjórafélaginu Frama, segir að ákvörðun áfrýjunarnefndar ákveðin vonbrigði en væntanlega muni flestar leigubifreiðastöðvar sækja um undanþágu um samræmda gjaldskrá eins og kveðið er á um í samkeppnislögum. Það sé stöðva sem hafi yfir 5 prósenta markaðshlutdeild að sækja um undanþágu og Hreyfill hafi þegar ákveðið að gera það. Hann reikni með að hinar fylgi í kjölfarið.

Hjalti reiknar með að taxti leigubíla hækki eitthvað með breytingunum, í samræmi við verðlagsþróun í landinu. Hann bendir á að skortur sé á reglum um að taxti skuli vera neytendum sýnilegur í leigubifreiðum. Neytendur verði að geta gengið að honum vísum.

Gísli Tryggvason, talsmaður neytenda, hefur boðað fulltrúa Samgönguráðuneytisins, Vegagerðarinnar, Neytendasamtakanna, Neytendastofu og hagsmunasamtök leigubílstjóra á sinn fund á miðvikudag vegna málsins. Þar verður kannað hvort menn standi frammi fyrir einhverjum vanda vegna úrskurðarins og þá hvernig leysi skuli hann.