Dagsbrún fær 730 milljóna endurgreiðslu frá danska ríkinu

Dagsbrún, sem hyggur á útgáfu fríblaðs í Danmörku, fær um 730 milljónir íslenskra króna endurgreiðslu frá danska ríkinu þar sem notast verður við dönsku póstþjónustuna við að dreifa blaðinu. Ritstjórar þeirra dagblaða sem nú eru á markaði segja ljóst að þeir munu þurfa að gera breytingar á blöðunum til að standa af sér íslenskættuðu samkeppnina.

Danska viðskiptablaðið Börsen gerir áætlunum Dagsbrúnar, móðurfélags Fréttablaðsins og NFS, um danskt fríblað ítarleg skil. Þar er sérstaklega rætt um dreifingu blaðsins, sem danski pósturinn mun sjá um. Ef Dagsbrún dreifir 500 þúsund blöðum inn á dönsk heimili þýðir það að ríkið greiðir fyrirtækinu 60 milljónir danskra króna til baka, eða um 730 milljónir íslenskra króna, lögum samkvæmt vegna þess að fyrirtækið notast við póstdreifingu. Svona hafa reglurnar verið en munu breytast á næsta ári og verður þá þak sett á greiðslurnar.

Áætlanir Dagsbrúnar, um að ryðja sér til rúms á dönskum dagblaðamarkaði, eru bornar undir ritstjóra Politiken og Berglinske Tidende. Niels Lunde, aðalritsjóri Berlingske, segir ljóst að ritstjórn blaðsins, sem selt er í áskrift, þurfi að aðlaga sig breytingum á markaði. Gæðin þurfi að auka svo Danir hafi enn áhuga á að greiða sérstaklega fyrir Berglinske Tidende.

Töger Seidenfaden hjá Politiken er síður en svo áhyggjufullur og segist fagna samkeppninni. Danir hafi nú þegar úr mörgu að velja, nýtt blað Dagsbrúnar hafi lítið að segja enda hafi Politiken sérstöðu. Helst á hann von á að auglýsingasala gæti minnkað.

Fyrir á markaði eru tvö fríblöð í Danmörku sem koma út daglega, Urban og Metro Express. Þau sækir fólk við biðskýli eða fær þau afhent hjá blaðburðarfólki sem er við fjölfarnar götur.