Akureyrarbær flytur viðskipti sín til Glitnis

Akureyrarbær hefur ákveðið að flytja öll bankaviðskipti sín til Glitnis og

tekur samningurinn til allra bankaviðskipta Akureyrarbæjar að undanskildum langtímalánum bæjarins. Glitnir mun hafa umsjón með útlána- og innlánaviðskiptum bæjarins, innheimtuþjónustu, greiðsluþjónustu og annarri almennri bankaþjónustu. Samningurinn gildir einnig fyrir stofnanir bæjarins og Norðurorku hf.

Á fundi Bæjarráðs Akureyrar þann 9. mars var samþykkt að ganga til viðræðna við Glitni um bankaviðskipti Akureyrarbæjar. Þetta var samþykkt í framhaldi af útboði á viðskiptunum sem í tóku þátt allir bankar og sparisjóðir á Eyjafjarðarsvæðinu. Tilboð Glitnis var metið hagstæðast og því var ákveðið að ganga til samninga við bankann. Þetta er í fyrsta skipti sem Akureyrarbær flytur bankaviðskipti sín milli viðskiptabanka frá árinu 1904.

Bjarni Ármannsson, forstjóri Glitnis, Kristján Þór Júlíusson, bæjarstjóri á

Akureyri, og Franz Árnason, forstjóri Norðurorku, munu undirrita samninga

Glitnis við Akureyrarbæ og Norðurorku í Hlíðarfjalli miðvikudaginn 12.

apríl kl. 15:00.