Stúdentakosningar í HÍ í dag og á morgun

Stúdentar við Háskóla Íslands velja í dag og á morgun nýja fulltrúa til þess að gæta hagsmuna sinna næsta árið. NFS leit við á kosningaskrifstofum tveggja fylkinga í gærkvöld þar sem frambjóðendur og sjálfboðaliðar unnu enn hörðum höndum.

Síðastliðið ár í stúdentapólitíkinni hefur verið nokkuð óvenjulegt miðað við árin á undan. Engin fylking hefur haft hreinan meirihluta heldur hafa þrjár fylkingar deilt völdum, en Háskólalistinn sem komst í oddastöðu í síðustu kosningum hefur haft embætti formanns Stúdentaráðs þrátt fyrir að hafa aðeins tvo fulltrúa af tuttugu.

Það var í nógu að snúast á skrifstofu Röskvu að Austurstæti 14 í gærkvöld enda mikið í húfi fyrir þá fjölmörgu sem starfað hafa að kosningabaráttunni. Dagný Ósk Aradóttir, sem er í fyrsta sæti á lista Röskvu til Stúdentaráðs,segir stúdenta mikilvægt þrýstiafl í þjóðfélaginu.Röskvu finnist því kosningarnar snúast um það hvert hlutverk Stúdentaráðs eigi að vera. Röskva telji ráðið eiga að vera algerlega órhætt við að berjast bæði gegn Alþingi og stjórnvöldum og líka innan Háskólans. Standa eigi vörð um hagsmuni stúdenta á öllum vettvöngum.

Háskólalistinn hefur ekki verið með eiginlega kosningaskrifstofu en baráttumál fylkingarinnar er að Stúdentaráð verði sterkari málsvari stúdenta. Fjölnir Guðmannsson, fyrsti maður á lista Háskólalistans til Stúdentaráðs, segir listann telja að það sé auðveldast að gera með því að taka upp einstaklingskosningar vegna þess að þegar fólk starfi innan fylkinga starfi það alltaf að hagsmunum stúdenta með hliðsjón af því hvað henti fylkingunni best fyrir næstu kosningar. Þá sé líka hætta á því að Stúdentaráð komi fram sem klofið afl.

Um 9300 stúdentar eru á kjörskrá og verða kjördeildir opnar í flestum byggingum Háskólans bæði í dag og á morgun.