Horfa þarf til annarra meðferðarúrræða

Viðamikil rannsókn sem Rauði krossinn og Geðhjálp stóðu að sýna að geðfötluðum og fjölskyldum þeirra finnst þörf á að efla stuðning við einstaklinga og að horft sé til annara meðferðarúrræða en lyfjameðferðar.

"Þetta tryggingakerfi er þannig að það þarf að vera einhver sem þekkir það af eigin raun og getur sagt mönnum hvernig það á að vera," segir Garðar Sölvi Helgason öryrki. "Ég get sagt þér að gagnvart öryrkjum ætti stærsta deildin að vera endurhæfingardeild en mér skilst að hún sé ekki til."

"Það þarf að efla ráðgjöf og samtalsmeðferð," segir Arndís Ósk Jónsdóttir, ein rannsakenda. "Flestir þeir sem tóku þátt í lrannsókninni sögðu að lyfjameðferð væri fullnýtt. Stundum er hún það eina sem er í boði. Lyfjameðferð er góð upp að vissu marki en það þarf fleira að koma til. Það vantar persónulegan stuðning."

Garðar Sölviu segir mikilvægt að geðfatlaðir séu spurðir hvað þeir geti en ekki hvað þeir geti ekki.

"Ég er með geðklofa, sem mjög fáir vilja viðurkenna að þeir séu með, og mín fötlun lýsir sér þannig að ef ég reyni mikið á mig, hvort sem er andlega eða líkamlega er eins og það sé maður inni í höfðinu á mér sem ég hef enga stjórn á." segir Garðar. "Það er stundum talað um að fólk heyri raddir. Ég heyri engar raddir. Ég hef bara enga stjórn á hugsuninni. Ég verð að vera í starfi þar sem ég get hætt að gera það sem ég er að gera."

Garðar segir kerfið búa til öryrkja. Ein ástæðan fyrir því að konur eru fleiri í hópi öryrkja en karlar segir hann að sé sú að það sé erfiðara fyrir karla en konur að detta út af vinnumarkaði.