Finnst Paris vera ömurleg

Breska söngkonan Lily Allen hefur ekki mikið álit á Paris Hilton. Í nýlegu viðtali segir Lily að hún skilji ekki hvernig fólk geti keypt plötuna hennar og að það eigi að drepa hvern þann sem fjárfesti í eintaki. „Fyrir fimm árum síðan var kannski í lagi að gefa þetta út, en þá var ekki hægt að nálgast almennilega tónlist á netinu.

Núna eru komnir listamenn eins og ég eða Arctic Monkeys. Af hverju eru plötufyrirtæki að styðja þetta fjandans rusl,“ segir Lily reið í viðtalinu. Paris Hilton er þó ekki fyrsta stjarnan sem verður fyrir barðinu á Lily, en áður hefur hún sagt ljóta hluti um söngkonuna Cheryl Tweedy úr Girls Aloud og poppgyðjuna Madonnu. Eins og frægt er þá sló Lily í gegn með hjálp heimasíðunnar Myspace.com, en hún hafði þá reynt að koma sér á framfæri í lengri tíma.