Vesturportsprinsessa fædd

Vesturportsparinu Gísla Erni Garðarssyni og Nínu Dögg Filippusdóttur fæddist lítil stelpa á fimmtudaginn, en hún er fyrsta barn þeirra hjóna. Prinsessan hefur hlotið nafnið Rakel María, og heitir þar með í höfuðið á föðursystur sinni, Rakel Garðarsdóttur sem er framkvæmdastjóri Vesturports.

Rakel var að vonum stolt af nöfnu sinni og sagði alla vera við hestaheilsu þegar Fréttablaðið náði tali af henni í gær, en hún var þá búin að heilsa upp á splunkunýja frænku sína. „Hún er bara lítil, sæt stelpa. Falleg og eiturhress,“ sagði hún sposk.

Rakel María var einar 16 merkur þegar hún kom í heiminn. „Þetta er stór og stæðileg stelpa,“ sagði Rakel hin eldri. „Það eru náttúrulega allir í skýjunum með þetta, eins og alltaf þegar börn fæðast. Það er voða sjaldan eitthvað annað í gangi,“ bætti hún við.

Nína Dögg hefur haft hægt um sig að undanförnu, og dvaldist til dæmis heima við á meðan Vesturport lagðist í leikleiðangur um Evrópu. Í síðasta afkvæmi Vesturports, kvikmyndinni Börnum, fór Nína Dögg hins vegar á kostum í hlutverki fjögurra barna móður og hefur því einhverja reynslu af hlutverkinu sem hún spreytir sig nú á í veruleikanum.