Slökkvistarf í fallgöngum Kárahnjúkavirkjunar

Slökkviliðsmenn á Héraði unnu afrek þegar þeir slökktu eld, sem logaði á vinnupöllum inni í lóðréttum fallgöngum Kárahnjúkavirkjunar undir kvöld í gær. Eldsins varð vart laust fyrir klukkan fimm og voru öll nálæg vinnusvæði rýmd þar sem reyk lagði frá eldinum.

Göngin eru fjögur hundruð og tuttugu metra há og logaði eldurinn í tvö hundruð og tuttugu metra hæð. Slökkviliðsmenn þurftu að nálgast eldinn neðan frá og koma öllum sínum búnaði upp, þar á meðal reykköfunarbúnaði. Eftir að þeir komust á vettvang gekk slökkvistarfið vel en þrjár sérhæfðar rafsuðuvélar og fleiri áhöld brunnu. Þá brunnu rafleiðslur, en þær voru þó ekki hluti af varanlegum rafbúnaði í stöðinni. Talið er að kviknað hafi í út frá rafmagni, en nánari rannsókn stendur yfir.